Москва ҳукумати Россияга меҳнат қилиш истагида ташриф буюраётган чет элликларни тестдан ўтказиш вазифасини янги давлат органи зиммасига юклаш масаласини кўриб чиқмоқда, деб хабар қилади “Известия” нашри асосида Спутник Тожикистон.
Россияда мигрантлар ўз мутахассислигини тасдиқлашлари лозим бўлади
ФМСнинг тарқатиб юборилган бўлинмаси ўрнига эндиликда ушбу масала билан Россия Таълим вазирлиги ёки Таълим муассасаларини назорат қилувчи қўмита шуғулланиши мумкин, деб хабар қилмоқда нашр.
“Таълим вазирлиги тестларни мураккаблаштирмаслик тарафдори бўлса-да, ҳозирда, ҳар бир регион тестларни мустақил равишда тузмоқда, шу боис, у ёки бу регионда бу масала борасида талаблар қандай бўлиши номаълум”, деб таъкидлади ҳукуматдаги манба.
Бундан ташқари, тест олиш учун тўланадиган тўлов қийматини белгилаш ҳам Таълим вазирлиги зиммасига юклатиши эҳтимоли борлиги айтилмоқда.
Тест топшириш жараёнида қоидабузарликка йўл қўйган мигрантлар эса жарима тўлашга мажбур этилади, деб таъкидланган нашрда.
“Известия”да келтирилган маълумотларга кўра, 2015 йилда 1,7 миллион киши, яъни, йил давомида Россияга ташриф буюрган чет элликларнинг 90% тестдан муваффақиятли ўтган.
Тест топширган чет элликлар орасида Ўзбекистон фуқаролари кўпчиликни ташкил қилган(44%), ундан кейин Тожикистон (23%), Украина (11%), Озарбайжон (5%), Молдова(4%), Хитой, Арманистон ва Қирғизистон(3%дан) давлатлари туради.
манба: Sputnik